hasrat-e-pā.emāl meñ gum haiñ

ham fareb-e-ḳhayāl meñ gum haiñ

bujhtī yādoñ ke surma.ī saa.e

shām-e-rañj-o-malāl meñ gum haiñ

ham hisār-e-vajūd ke rah-rau

gardish-e-lā-zavāl meñ gum haiñ

sham.a insāniyat ke nūr-faroġh

zulmat-e-infi.āl meñ gum haiñ

vo abad tak uruuj kā partav

ham azal se zavāl meñ gum haiñ

ab bhañvar meñ phañsā hai māhī-gīr

machhliyāñ jaal jaal meñ gum haiñ

lāla-o-gul ye mahr o maah o nujūm

sab tire ḳhadd-o-ḳhāl meñ gum haiñ

shām-e-ġham kī hazār-hā shāmeñ

mere jām-e-sifāl meñ gum haiñ

hijr kī be-panāh rātoñ meñ

log shauq-e-visāl meñ gum haiñ

kashtī-e-zīst khe rahe haiñ 'atash'

bahr kār-e-muhāl meñ gum haiñ