muddatoñ baad ham kisī se mile
yuuñ lagā jaise zindagī se mile
is tarah koī kyuuñ kisī se mile
ajnabī jaise ajnabī se mile
saath rahnā magar judā rahnā
ye sabaq ham ko aap hī se mile
zikr kāñToñ kī dushmanī kā nahīñ
zaḳhm phūloñ kī dostī se mile
un kā milnā bhī thā na milnā sā
vo mile bhī to be-ruḳhī se mile
dil ne majbūr kar diyā hogā
jis se milnā na thā usī se mile
un andheroñ kā kyā gila 'maḳhmūr'
vo andhere jo raushnī se mile