apne markaz pe na puurā huā chakkar merā

ajnabī haath badalte rahe mehvar merā

mere qālib kī shanāsā nahīñ hai.at merī

apne saa.e se bhī bezār hai paikar merā

mere siine pe to dushman kā koī zaḳhm nahīñ

mere pahlū meñ jo utrā hai to ḳhanjar merā

maiñ to ab tak nahīñ sīkhā huuñ zamīñ par chalnā

aur ḳhalāoñ meñ hai chhāyā huā shahpar merā

kis ko baḳhshā hai ḳhudāyā mirī qismat likhnā

kis ke hāthoñ meñ diyā tū ne muqaddar merā

maiñ vo sultāñ huuñ ki ghaTtī hai riyāsat jitnī

utnā utnā hī baḌhā kartā hai lashkar merā

band-e-ġham TūTne vaalā hai kisī dam 'partav'

aisā lagtā hai chhalakne ko hai sāġhar merā