mire vajūd se aatī hai ik sadā mujh ko
ki mere jism se kar de koī judā mujh ko
mirī talāsh kā hāsil faqat tahayyur hai
maiñ kho gayā huuñ kahāñ ḳhud nahīñ patā mujh ko
maiñ apne jism ke andar simaT ke baiThā huuñ
bulā rahā hai kahīñ duur se ḳhudā mujh ko
maiñ tujh ko dekhūñ magar guftugū na kar pā.ūñ
ḳhudā ke vāste aisī na de sazā mujh ko
vo lahja ab bhī tasavvur meñ gūñjtā hai 'asar'
vo chehrā ab bhī dikhātā hai ā.īnā mujh ko