bhaTak rahe haiñ ġham-e-āgahī ke maare hue
ham apnī zaat ko pātāl meñ utāre hue
sadā-e-sūr-e-sarāfīl kī rasan-basta
palaT ke jā.eñge ik roz ham pukāre hue
shikast-e-zāt shikast-e-hayāt bhī hogī
ki jī na pā.eñge ham hausloñ ko haare hue
ai mere ā.īna-rū ab kahīñ dikhā.ī de
ik umr biit ga.ī ḳhāl-o-ḳhad sañvāre hue
matā-e-jāñ haiñ mirī umr bhar kā hāsil haiñ
vo chand lamhe tire qurb meñ guzāre hue
zamīñ pe zarra-e-be-nām the magar 'shahbāz'
bulandiyoñ pe pahuñch kar hamīñ sitāre hue