arz-e-ahvāl-e-dil-e-zār karūñ yā na karūñ
ishq se apne ḳhabar-dār karūñ yā na karūñ
gosh-e-dil se kabhī vo haal sune yā na sune
vā maiñ apne lab-e-guftār karūñ yā na karūñ
bosa ik us se jo māñgā to lagā kahne nahīñ
hai shash-o-panj ki takrār karūñ yā na karūñ
kahiye ai hazrat-e-dil kyā hai salāh-e-daulat
yaar se shikva-e-dīdār karūñ yā na karūñ
phuul aage na mire toḌ zarā ai gulchīñ
kah tū sair-e-gul-o-gulzār karūñ yā na karūñ