har lamha nam-dīda rahne kī aadat
le Duubī ranjīda rahne kī aadat
ab apnā chehra begāna lagtā hai
ham ko thī sanjīda rahne kī aadat
āḳhir ham ko be-zārī tak le aa.ī
har shai par girvīda rahne kī aadat
rafta rafta uryānī tak aa pahuñche
jin ko thī poshīda rahne kī aadat
dikh jaate haiñ yuuñ hī kuchh rañgīñ manzar
achchhī hai ḳhvābīda rahne kī aadat
ham haamī haiñ sīdhī-sādī bātoñ ke
aur us ko pechīda rahne kī aadat
āḳhir-kār varaq ke chithḌe kar degī
har mausam bosīda rahne kī aadat