ḳhvāb kā chehra piilā paḌte dekhā hai
ik ta.abīr ko suulī chaḌhte dekhā hai
ik tasvīr jo ā.īne meñ dekhī thī
us kā ik ik naqsh bigaḌte dekhā hai
sub.h se le kar shaam talak un āñkhoñ ne
apne hī saa.e ko baḌhte dekhā hai
us se haal chhupānā to hai nā-mumkin
ham ne us ko āñkheñ paḌhte dekhā hai
ashk-e-ravāñ rakhnā hī achchhā hai varna
tālāboñ kā paanī saḌte dekhā hai
ik ummīd ko ham ne akasr ḳhalvat meñ
ek adhūrī mūrat gaḌhte dekhā hai
dil meñ koī hai jis ko akasr ham ne
har ilzām hamīñ par maḌhte dekhā hai