ik ḳhvāb hai ye pyaas bhī dariyā bhī ḳhvāb hai
hai ḳhvāb tū bhī terī tamannā bhī ḳhvāb hai
ye iltizām-e-dīda-e-ḳhush-ḳhvāb bhī hai ḳhvāb
rañg-e-bahār qāmat-e-zebā bhī ḳhvāb hai
vo manzileñ bhī ḳhvāb haiñ āñkheñ haiñ jin se chuur
haañ ye safar bhī ḳhvāb hai rasta bhī ḳhvāb hai
ye rif.ateñ bhī ḳhvāb haiñ ye āsmāñ bhī ḳhvāb
parvāz bhī hai ḳhvāb parinda bhī ḳhvāb hai
haiñ apnī vahshateñ bhī bas ik ḳhvāb kā tilism
yaaro fusūn-e-vus.at-e-sahrā bhī ḳhvāb hai