barg-e-gul shāḳh-e-hijr kā kar de
ai ḳhudā ab mujhe harā kar de
har palak ho nam-āshnā mujh se
merā lahja bahār sā kar de
mujh ko raushan mire bayān meñ kar
ḳhāmushī ko bhī aa.inā kar de
baiTh jā.ūñ na thak ke misl-e-ġhubār
dasht meñ sūrat-e-sabā kar de
merī takmīl harf-o-saut meñ ho
mujhe pāband-e-iltijā kar de
kaun dastak pe kaan dhartā hai
tū mire haath dil-kushā kar de
ai jamāl-e-dayār-e-kashf-o-kamāl
mauja-e-rañg ko navā kar de