ġham judā pesh rahā hai mire afkār judā
dil pe ye maar judā rahtī hai vo maar judā
ho ga.ī band jo bīmār-e-mohabbat kī zabāñ
chāra-gar chup haiñ judā mūnis-o-ġham-ḳhvār judā
dil bhī kyā jins hai manhūs vo farmāte haiñ
bechne vaale judā rau meñ ḳharīdār judā
tum agar jaao to vahshat mirī khā jaa.e mujhe
ghar judā khāne ko aa.e dar-o-dīvār judā
maal kā mol hai mauqūf ḳharīdāroñ par
dasht-e-kan.āñ hai judā misr kā bāzār judā
mujh se nārāz haiñ jo log vo ḳhush haiñ un se
maiñ judā chiiz huuñ 'nātiq' mire ash.ār judā