vaj.h-e-rusvā.ī hai ab lā.eq-e-mahfil honā

un kī fahrist-e-tabarrā meñ na shāmil honā

fan kā da.avā hai to kuchh jur.at-e-iz.hār bhī ho

zeb detā nahīñ fankār ko buzdil honā

mad.h-e-gul-chīñ ho jahāñ maslak-e-murġhān-e-chaman

ham ko manzūr nahīñ faḳhr-e-anādil honā

apnī pahchān hai vo qarya-e-tārīk jahāñ

munsifoñ ko bhī mayassar nahīñ aadil honā

mere sheroñ ne use soch meñ Daalā to sahī

nek hai dil meñ bhī razm-e-haq-o-bātil honā

chāñd nikle to sahī baam pe kuchh shor to ho

kuchh zarūrī to nahīñ hai mah-e-kāmil honā

na siyāsat na ma.īshat na ba-nām-e-maz.hab

ab gavārā nahīñ pāband-e-salāsil honā

sāneha is se baḌā aur bhalā kyā hogā

'ḳhālid' us shoḳh ke qabze meñ mirā dil honā