jo dekhtā hai mujhe ā.īne ke andar se
vo kaun hai koī pūchhe bhī us sitamgar se
sukūt TuuT gayā ḳhāmushī ke jañgal kā
mirī sadā.eñ uThīñ is tarah mire ghar se
maiñ ek tinke kī sūrat hamesha bahtā rahā
mujhe mafar na milā vaqt ke samundar se
mire dayār meñ maazī kī jo thiiñ tasvīreñ
sabhoñ ko toḌ diyā maiñ ne aaj patthar se
tamām raat koī bhī na thā mire ghar meñ
lipaT ke soī thī tanhā.ī mere bistar se