samajh meñ aatī hai bādal kī āh-o-zārī ab
vo mehrbān mujhe bhī bahut rulātā hai
mumāsalat hī nahīñ saath rahne vāloñ meñ
koī batā.e mujhe kis se merā naata hai
lagā ki qufl mire ḳhvāb ke darīchoñ ko
tirā ḳhayāl azāboñ se kyuuñ Darātā hai
samajh meñ aatā nahīñ zinda haiñ ki murda haiñ
kabhī to mārtā hai aur kabhī jilātā hai
hazāroñ taare haiñ terī hatheliyoñ meñ magar
tū aa ke ghar se mere chāñd kyuuñ churātā hai