bulandiyoñ pe zamāne hai kyā kiyā jaa.e
hameñ bhī chāñd pe jaanā hai kyā kiyā jaa.e
vo jis ke sāmne khulte nahīñ haiñ lab mere
usī ko sher sunānā hai kyā kiyā jaa.e
havas kī zad pe taḌaptī sisaktī duniyā meñ
vaqār apnā bachānā hai kyā kiyā jaa.e
nikal paḌā hai koī ghar se bijliyāñ le kar
mirā chaman hī nishāna hai kyā kiyā jaa.e
bahār se hī Dare baiThe haiñ chaman vaale
abhī ḳhizāñ ko bhī aanā hai kyā kiyā jaa.e