bikhar jā.eñge ham kyā jab tamāshā ḳhatm hogā

mire ma.abūd āḳhir kab tamāshā ḳhatm hogā

charāġh-e-hujra-e-darvesh kī bujhtī huī lau

havā se kah ga.ī hai ab tamāshā ḳhatm hogā

kahānī meñ na.e kirdār shāmil ho ga.e haiñ

nahīñ ma.alūm ab kis Dhab tamāshā ḳhatm hogā

kahānī aap uljhī hai ki uljhā.ī ga.ī hai

ye uqda tab khulegā jab tamāshā ḳhatm hogā

zamīñ jab adl se bhar jā.egī nūrun-alā-nūr

ba-nām-e-maslak-o-maz.hab tamāshā ḳhatm hogā

ye sab kaTh-putliyāñ raqsāñ raheñgī raat kī raat

sahar se pahle pahle sab tamāshā ḳhatm hogā

tamāshā karne vāloñ ko ḳhabar dī jā chukī hai

ki parda kab giregā kab tamāshā ḳhatm hogā

dil-e-nā-mutma.in aisā bhī kyā māyūs rahnā

jo ḳhalq uTThī to sab kartab tamāshā ḳhatm hogā