koī to phuul khilā.e duā ke lahje meñ
ajab tarah kī ghuTan hai havā ke lahje meñ
ye vaqt kis kī ra.ūnat pe ḳhaak Daal gayā
ye kaun bol rahā thā ḳhudā ke lahje meñ
na jaane ḳhalq-e-ḳhudā kaun se azaab meñ hai
havā.eñ chīḳh paḌīñ iltijā ke lahje meñ
khulā fareb-e-mohabbat dikhā.ī detā hai
ajab kamāl hai us bevafā ke lahje meñ
yahī hai maslahat-e-jabr-e-ehtiyāt to phir
ham apnā haal kaheñge chhupā ke lahje meñ