ye log DhūñD rahe haiñ yahāñ vahāñ mujh ko
talāsh karte nahīñ apne darmiyāñ mujh ko
maiñ agle pichhle zamānoñ se ho ke aayā huuñ
kahīñ nazar nahīñ aa.e haiñ raftagāñ mujh ko
vo jis meñ lauT ke aatī thī ek shahzādī
abhī talak nahīñ bhūlī vo dāstāñ mujh ko
ye kis ne kar diyā saiqal zamīñ kā ā.īna
tah-e-zamīñ nazar aatā hai āsmāñ mujh ko
ajiib shaḳhs hai jis ne kahīñ nahīñ jaanā
ye kah ke dekhtā jaatā hai kārvāñ mujh ko
mujhe ḳhabar hai kahānī kā ant aa gayā hai
mujhe ḳhabar hai ki honā hai rā.egāñ mujh ko