piilā thā chāñd aur shajar be-libās the
tujh se bichhaḌ ke gaañv meñ saare udaas the
sochā to tū magan thā faqat merī zaat meñ
dekhā to kitne log tire ās-pās the
jab ham na mil sake to hameñ mānñā paḌā
bastī ke log kitne sitāra-shanās the
dil is pe mutma.in thā ki ham ek ho ga.e
lekin ka.ī gumāñ mirī sochoñ ke paas the
vo phuul ho sitāra ho shabnam ho jhiil ho
terī kitāb-e-husn ke sab iqtibās the
'ashfāq' us ko dekh ke ham se ġhazal huī
muddat se varna ham to yūñhī mahv-e-yās the