pa.e sajda agar mujh ko na terā āstāñ miltā
jo paiham milne vaalā thā sukūn-e-dil kahāñ miltā
mirī mastī pe zāhid kis liye ab rashk kartā hai
tirī taqdīr meñ hotā to lutf-e-jāvedāñ miltā
haram tak hī agar mahdūd hotī āshiqī apnī
tum hī socho ki phir tum sā but-e-kāfir kahāñ miltā
mirī shaffāf peshānī ne merī laaj rakh lī hai
mujhe kyā kyā samajhte tum jo sajdoñ kā nishāñ miltā
'azīz'-e-vārsī jo tum bhī ibn-ul-vaqt ho jaate
tumhārā tazkira bhī dāstāñ-dar-dāstāñ miltā