tirī talāsh meñ nikle haiñ tere dīvāne
kahāñ sahar ho kahāñ shaam ho ḳhudā jaane
haram hamīñ se hamīñ se haiñ aaj but-ḳhāne
ye aur baat hai duniyā hameñ na pahchāne
haram kī raah meñ haa.il nahīñ haiñ but-ḳhāne
haram se ahl-e-haram ho ga.e haiñ begāne
ye ġhaur tū ne kiyā bhī ki hashr kyā hogā
taḌap uTThe jo qayāmat meñ tere dīvāne
'azīz' apnā irāda kabhī badal na sakā
haram kī raah meñ aa.e hazār but-ḳhāne