shīsha lab se judā nahīñ hotā
nashsha phir bhī sivā nahīñ hotā
dard-e-dil jab sivā nahīñ hotā
ishq meñ kuchh mazā nahīñ hotā
har nazar surmagīñ to hotī hai
har hasīñ dilrubā nahīñ hotā
haañ ye duniyā burā banātī hai
varna insāñ burā nahīñ hotā
asr-e-hāzir hai jab qayāmat-ḳhez
hashr phir kyuuñ bapā nahīñ hotā
pārsā rind ho to saktā hai
rind kyuuñ pārsā nahīñ hotā
sher ke fan meñ aur bayāñ meñ 'azīz'
'momin' ab dūsrā nahīñ hotā