lafz kī kā.enāt meñ gum huuñ
fikr meñ gum huuñ baat meñ gum huuñ
tum ho kho.e hue zamāne meñ
maiñ ḳhud apnī hī zaat meñ gum huuñ
kyā ajab thā jo maut aa jaatī
ġham to ye hai hayāt meñ gum huuñ
fat.h ke jashn meñ haiñ sab sarshār
maiñ to apnī hī maat meñ gum huuñ
tum ne jin mushkiloñ meñ chhoḌā thā
maiñ unhīñ mushkilāt meñ gum huuñ
zahr khānā mujhe nahīñ aatā
qand meñ aur nabāt meñ gum huuñ
koī aa.e na dekhne mujh ko
maiñ ajab kā.enāt meñ gum huuñ
maiñ huuñ 'māmūn' ik ajab insān
kā.enāt aur zaat meñ gum huuñ