charāġh duniyā ke saare bujhā ke chaltā huuñ
añdherī raat meñ ik dil jalā ke chaltā huuñ
dikhā.ī detā hai darvāza-e-fanā mujh ko
maiñ sab hijāb nazar se uThā ke chaltā huuñ
dikhā.ī dete haiñ saare ḳhazāne dhartī ke
maiñ saare sañg rahoñ ke haTā ke chaltā huuñ
alam meñ sar merā koī uThā.egā kyūñ-kar
maiñ ḳhvān-e-azm meñ sar ko sajā ke chaltā huuñ
mujhe pahuñchnā hai bas apne-āp kī had tak
maiñ apnī zaat ko manzil banā ke chaltā huuñ