charāġh jab se mire tīrgī se haar ga.e

havā se haath milāne ko saare yaar ga.e

har ek baar safar merā muḳhtasar kyuuñ thā

safīne mujh ko hī sāhil pe kyuuñ utaar ga.e

tirī sarā.e meñ sāmāñ kahāñ sukūn kā thā

kisī tarah se musāfir bhī shab guzār ga.e

maiñ jin ko saa.e meñ rakhtā thā tapte sahrā meñ

ġhazab hai log vahī mujh pe sañg maar ga.e

huī jo shaam to lauTe vatan meñ apne hī

parinde yuuñ to bahut sarhadoñ ke paar ga.e

burīda-sar hī nahīñ the lahū meñ Duube hue

sunā hai neze adū ke bhī ashk-bār ga.e

badan pe sab ke qabā.eñ thiiñ surḳh āñkhoñ kī

ajab tarah se ḳhizāoñ meñ gul-e-ezār ga.e