ai ḳhudā jab se atā kī tū ne peshānī mujhe

sar uThāne meñ huī hai kitnī āsānī mujhe

apne dil meñ hī basā rakkhī hai maiñ ne kā.enāt

koī kah saktā nahīñ ab naqsh-e-vīrānī mujhe

aise vahshat-nāk manzar mujh meñ aate haiñ nazar

ab nahīñ hotī kisī par koī hairānī mujhe

saiñkaḌoñ sadiyoñ se sahrā kī sadā ke saath huuñ

raas aa saktī nahīñ dariyā kī sultānī mujhe

us taraf hī chal paḌūñgā sochne kā kyā maqām

jis taraf le jā.egī ye rāh-e-anjānī mujhe