ye soch kar ki terī jabīñ par na bal paḌe
bas duur hī se dekh liyā aur chal paḌe
dil meñ phir ik kasak sī uThī muddatoñ ke ba.ad
ik umr ke ruke hue aañsū nikal paḌe
siine meñ be-qarār haiñ murda mohabbateñ
mumkin hai ye charāġh kabhī ḳhud hī jal paḌe
ai dil tujhe badaltī huī rut se kyā milā
paudoñ meñ phuul aur daraḳhtoñ meñ phal paḌe
ab kis ke intizār meñ jāgeñ tamām shab
vo saath ho to niiñd meñ kaise ḳhalal paḌe
sūraj sī us kī tab.a hai sho.ala sā us kā rañg
chhū jaa.e us badan ko to paanī ubal paḌe
'shahzād' dil ko zabt kā yaarā nahīñ rahā
niklā jo māhtāb samundar uchhal paḌe