ye kis ġham se aqīdat ho ga.ī hai
ġham-e-duniyā se fursat ho ga.ī hai
ham apne haal par ḳhud ro diye haiñ
kabhī aisī bhī hālat ho ga.ī hai
agar do dil kahīñ bhī mil ga.e haiñ
zamāne ko shikāyat ho ga.ī hai
kahāñ maiñ aur kahāñ ālām-e-hastī
magar jiinā to aadat ho ga.ī hai
zarā sā ġham huā aur ro diye ham
baḌī nāzuk tabī.at ho ga.ī hai
ḳhabar kyā ho jahāñ vāloñ kī ham ko
unheñ dekhe bhī muddat ho ga.ī hai
sakūñ milne lagā 'shahzād' mujh ko
taḌap jaane kī sūrat ho ga.ī hai