thoḌā sā rañg raat ke chehre pe Daal do

kyā sochte ho jaam havā meñ uchhāl do

samjhegā kaun ruuh kī gahrā.iyoñ ke raaz

pūchhe koī to bātoñ hī bātoñ meñ Taal do

sūraj hai aur pyaas ke maare hue haiñ log

saarī ḳhudā.ī barf ke paanī meñ Daal do

zindāñ meñ kis liye mujhe karte ho tum asiir

dīvāna huuñ to shahr se bāhar nikāl do

saa.e ke pīchhe bhāgte phirne se fā.eda

har aarzū ko jism ke paikar meñ Dhaal do

vaise ye tīrgī bhī burī chiiz to nahīñ

lekin kabhī to aa ke diloñ ko ujaal do

'shahzād' dostī meñ bhalā kyā milā tumheñ

ho ahl-e-dil to dil kā janāza nikāl do