tirī talāsh to kyā terī aas bhī na rahe
ajab nahīñ ki kisī din ye pyaas bhī na rahe
har ek samt ḳhalā hī ḳhalā nazar aa.eñ
ḳharāba-e-dil-e-vīrāñ meñ yaas bhī na rahe
ġham-e-firāq kī talḳhī vo dasht hai ki jahāñ
koī qarīb to kyā ās-pās bhī na rahe
tirā ḳhayāl hī par tol kar uḌā le jaa.e
koī umiid sharīk-e-havās bhī na rahe
tamām rañg hai ḳhushbū tamām ḳhushbū rañg
guloñ se rañg uḌā leñ to baas bhī na rahe
luTā hai qāfila-e-āgahī do-rāhe par
zamāna-sāz to kyā ḳhud-shanās bhī na rahe
kisī tarīq se 'shahzād' dil ko samjhā leñ
na muskurā.e magar yuuñ udaas bhī na rahe