laboñ pe aa ke rah ga.iiñ shikāyateñ kabhī kabhī

tire huzūr paḌ ga.iiñ ye uljhaneñ kabhī kabhī

bas ik bisāt-e-ārzū bikhar ga.ī to kyā huā

ujaḌ ga.ī haiñ mahfiloñ kī mahfileñ kabhī kabhī

hazār baar husn ḳhud hī nādim-e-jafā huā

agarche ishq ne bhī kiiñ shikāyateñ kabhī kabhī

kabhī kabhī tirī nazar kā aasrā bhī mil gayā

simaT ke rah ga.iiñ haiñ ġham kī vus.ateñ kabhī kabhī

thiiñ donoñ samt ḳhvāhisheñ ye faisla na ho sakā

bhaḌak uTheñ ham ek saath yā jaleñ kabhī kabhī