merī ḳhātir der na karnā aur safar karte jaanā

lekin chhoḌ ke jaane vaalo ek nazar karte jaanā

hijr kī shab ke taaro tum ko Duub to jaanā hai lekin

mere dil par kyā guzrī hai un ko ḳhabar karte jaanā

ham se dard ke māroñ kī muḳhtārī kyā majbūrī kyā

jiinā aur na marnā lekin umr basar karte jaanā

itnā sukūñ itnī ḳhāmoshī kaise raat guzāreñ ham

jaate jaate mahfil-e-dil ko zer-o-zabar karte jaanā

rotī āñkheñ yā hañste lab aap bhī ik saudā.ī haiñ

chup chup rahnā aur tavāf-e-rāhguzar karte jaanā

aur zarā chamkā denā yādoñ ke bhaḌakte sho.aloñ ko

ai ġham-e-daurāñ ai ġham-e-jānāñ dil pe asar karte jaanā

kis ko ḳhabar 'shahzād' ki un āñkhoñ meñ kaisā jaadū hai

kahnā aur na sunñā lekin dil meñ ghar karte jaanā