ḳhalq ne chhīn lī mujh se mirī tanhā.ī tak

ishq aa pahuñchā hai ilzām se rusvā.ī tak

khol rakkhā hai ye darvāza-e-dil tere liye

kaash tū dekh sake ruuh kī gahrā.ī tak

kyuuñ huuñ maiñ aur mire ġham kā use ehsās kahāñ

hai mulāqāt faqat anjuman-ārā.ī tak

yuuñ to ham ahl-e-nazar haiñ magar anjām ye hai

DhūñDte DhūñDte kho dete haiñ bīnā.ī tak

khul ga.e vo to khulā apnī mohabbat kā bharam

valvale dil meñ hazāroñ the shanāsā.ī tak

Dūbnā apnā muqaddar thā magar zulm hai ye

bah ga.e ek hī rele meñ tamāshā.ī tak

ḳhushk miTTī pe bhī girtā nahīñ pattā koī

ḳhāmushī vo hai ki chaltī nahīñ purvā.ī tak

shahr meñ ahl-e-jafā ahl-e-riyā rahte haiñ

ye havā kaash na pahuñche tire saudā.ī tak

apne anjām pe ḳhud ro.egī sham-e-mahfil

chhoḌ jā.eñge use us ke tamannā.ī tak

ham ne bhī dasht-navardī to bahut kī 'shahzād'

haath pahuñchā na kisī lāla-e-sahrā.ī tak