rāhat ke vāste na rifāqat ke vāste
ab koī mujh ko chāhe to chāhat ke vāste
ye iḳhtilāf-e-fikr bahut kaam aa.egā
is ko bachā ke rakh kisī saa.at ke vāste
donoñ ko is jahān meñ sach kī talāsh thī
itnā bahut thā ham meñ rifāqat ke vāste
maiñ ḳhvāhish-e-qayām se aage nikal gayā
ab mujh ko mat pukār iqāmat ke vāste
manzil mirī safar hai mirā zād-e-rāh bhī
maiñ chal rahā huuñ aaj masāfat ke vāste
vo saañp thā aur us ko sapere se pyaar thā
itnā bahut thā us kī halākat ke vāste