kyuuñ mil rahī hai un ko sazā chīḳhtī rahī
sunsān vādiyoñ meñ havā chīḳhtī rahī
hoñToñ kī larzishoñ meñ rahe harf munjamid
siine meñ dafn ho ke duā chīḳhtī rahī
sadme kī shiddatoñ se har ik aañkh ḳhushk thī
ye dekh kar falak pe ghaTā chīḳhtī rahī
ik maslahat ke sāmne majbūr to hue
lekin qadam qadam pe anā chīḳhtī rahī
ruḳhsat hue to rail kī siiTī meñ der tak
aisā lagā ki jaise vafā chīḳhtī rahī