jaise ki ik frame ho tasvīr ke baġhair

ham-ḳhvāb dekhte rahe ta.abīr ke baġhair

lāzim nahīñ ki pyaar meñ rishta ho jism kā

ḳhushbū hai saath phuul ke zanjīr ke baġhair

koshish to kar ke dekhnā taqdīr kuchh bhī ho

mat haar mānñā kabhī tadbīr ke baġhair

mulkoñ kī fikr chhoḌ ke qabza diloñ pe kar

mil jā.egā jahān ye tasḳhīr ke baġhair

hālāt kā dabāv hai imdād sab qubūl

lekin safed-posh huuñ tash.hīr ke baġhair

vaa.iz kare hai nekiyāñ lālach meñ huur kī

tab hī to us kī baat hai tāsīr ke baġhair