ye bastī pyaar kī ne.amat se ḳhālī hotī jaatī hai

ki har hātim kī sūrat bhī savālī hotī jaatī hai

kisī se pūchh lo ta.abīr apne apne ḳhvāboñ kī

dayār-e-misr meñ phir ḳhushk-sālī hotī jaatī hai

ye kaise rañg utre haiñ jinheñ dekhā nahīñ jaatā

ye kaisī sub.h phūTī hai jo kaalī hotī jaatī hai

purāne maqbaroñ meñ bhī darāḌeñ paḌtī jaatī haiñ

na.ī ta.amīr bhī naqsh-e-ḳhayālī hotī jaatī hai

bahāv aa.e din umr-e-ravāñ kā ghaTtā jaatā hai

ye ThāTheñ mārtī naddī bhī naalī hotī jaatī hai