saare bhūle bisroñ kī yaad aatī hai

ek ġhazal sab zaḳhm hare kar jaatī hai

pā lene kī ḳhvāhish se mohtāt raho

mahrūmī kī bīmārī lag jaatī hai

ġham ke pīchhe maare maare phirnā kyā

ye daulat to ghar baiThe aa jaatī hai

din ke sab hañgāme rakhnā zehnoñ meñ

raat bahut sannāTe le kar aatī hai

dāman to bhar jaate haiñ ayyārī se

dastar-ḳhvānoñ se barkat uTh jaatī hai

raat ga.e tak chaltī hai Tv par film

roz namāz-e-fazr qazā ho jaatī hai