jhuuT sachchā.ī kā hissa ho gayā
ik tarah se ye bhī achchhā ho gayā
us ne ik jaadū bharī taqrīr kī
qaum kā nuqsān puurā ho gayā
shahr meñ do-chār kambal baañT kar
vo samajhtā hai masīhā ho gayā
ye terī āvāz nam kyuuñ ho ga.ī
ġham-zada maiñ thā tujhe kyā ho gayā
bevafā.ī aa ga.ī chaupāl tak
gaañv lekin shahr jaisā ho gayā
sach bahut sajtā thā merī zaat par
aaj ye kapḌā bhī chhoTā ho gayā