jo ḳhvāb meñ huā thā vāqa.ī na ho

ki maiñ pukārtā rahūñ koī na ho

charāġh be-sabab to ro nahīñ rahe

jo shab guzar rahī hai āḳhirī na ho

jise sukūt-e-marg kā nishāñ kaheñ

ye ḳhāmushī kahīñ vo ḳhāmushī na ho

paḌī huī hai gard sī jo vaqt par

ye chashm-e-ḳhvāb-zād se girī na ho

mujhe ye hukm bhī sunā diyā gayā

ki naav meñ mire sivā koī na ho

yaqīñ bharī-bahār kā bhī kuchh nahīñ

agar ye shāḳh-e-dard hī harī na ho

mirā mo.āmla 'na.īm' aur hai

agar tirī nazar meñ sarsarī na ho