yuuñ bhī jab tak ġham se mar nahīñ jaatā maiñ

raat ga.e tak lauT ke ghar nahīñ jaatā maiñ

dekhtā rahtā huuñ tujh ko us lamhe tak!

jab tak saarā dard se bhar nahīñ jaatā maiñ

utnī der sameTūñ saare dukh tere

jitnī der ai dost bikhar nahīñ jaatā maiñ

tere ġham kā bojh uThā.ūñgā jab tak

koh-e-ġham se paar utar nahīñ jaatā maiñ

maut se aage tak ke manzar dekhe haiñ

tanhā.ī se yūñhī Dar nahīñ jaatā maiñ

'na.īm' us se maiñ apne saare dukh kahne

sochtā to rahtā huuñ par nahīñ jaatā maiñ