kis tarah jā.ūñ ki ye aa.e hue raat meñ haiñ

ye añdhere nahīñ haiñ saa.e mirī ghaat meñ haiñ

miltā rahtā huuñ maiñ un se to ye mil lete haiñ

yaar ab dil meñ nahīñ rahte mulāqāt meñ haiñ

ye to nākām asāsa hai samundar ke paas

kuchh ġhazabnāk sī lahreñ mire jazbāt meñ haiñ

ye dhueñ meñ jo nazar aate haiñ sarsabz yahāñ

ye makāñ shahr meñ ho kar bhī mazāfāt meñ haiñ

dil kā chhūnā thā ki jazbāt hue patthar ke

aisā lagtā hai ki ham shahr-e-tilismāt meñ haiñ

maiñ hī takrār huuñ aur maiñ hī mukarrar huuñ yahāñ

vaqt par chalte hue din mirī auqāt meñ haiñ