jald aa.eñ jinheñ siine se lagānā hai mujhe
phir badan aur kahīñ kaam meñ laanā hai mujhe
ishq paañv se lipaTtā hai to ruk jaatā huuñ
varna tum ho to tumheñ chhoḌ ke jaanā hai mujhe
mere hāthoñ ko ḳhudā rakkhe tire jism kī ḳhair
mas.ala ye hai tujhe haath lagānā hai mujhe
dil ko dhaḌkā sā lagā rahtā hai vo jaan na le
aur phir jabr to ye hai ki batānā hai mujhe
maañg letā huuñ tire ġham se zarā sardārī
ek duniyā hai jise dil se uThānā hai mujhe