muḳhtasar hī sahī mayassar hai

jo bhī kuchh hai nahīñ se behtar hai

din-dahāḌe gunāh kartā huuñ

mo'tabar ho na jā.ūñ ye Dar hai

manch par kāmyāb ho ki na ho

mujh ko kirdār apnā azbar hai

sab ko pathrā diyā palak jhapke

ham na kahte the shobada-gar hai

ain mumkin hai vo palaT aa.e

merā īmān mojazoñ par hai

pahle mausam pe tabsira karnā

phir vo kahnā jo dil ke andar hai

saare manzar hasīn lagte haiñ

dūriyāñ kam na hoñ to behtar hai

rāste bain kar rahe haiñ kyuuñ

kyā masāfat ye intihā par hai

fasl boī bhī ham ne kaaTī bhī

ab na kahnā zamīn banjar hai