saaf ā.īna hai kyuuñ mujhe dhundlā dikhā.ī de
gar aks hai ye merā to mujh sā dikhā.ī de
mujh ko to maar Dālegā merā akelā-pan
is bhiiḌ meñ koī to shanāsā dikhā.ī de
barbād mujh ko dekhnā chāhe har ek aañkh
mil kar rahūñgā ḳhaak meñ aisā dikhā.ī de
ye āsmāñ pe dhund sī chhā.ī huī hai kyā
gar abr hai to ham ko barastā dikhā.ī de
ye mujh ko kis maqām pe le aa.ī zindagī
yā rab koī farār kā rasta dikhā.ī de
'fārūq' dil kā haal maiñ jā kar kise kahūñ
har chehra mujh ko apnā hī chehra dikhā.ī de