raat bhar dard kī barsāt meñ dhoī huī sub.h

sab kī āñkhoñ meñ hai jaise koī roī huī sub.h

paak jazboñ ke samundar se nithārā huā nuur

nek sochoñ kī bilonī se biloī huī sub.h

phuul be-rañg fazā zard parinde ḳhāmosh

shaam kī god meñ thak-hār ke soī huī sub.h

kaun dekhegā mire ashk ko sūraj bante

kaun kāTegā mirī aañkh kī boī huī sub.h

yuuñ bhī lauTeñge vatan ko kabhī ham hijr-nasīb

DhūñDhtī hogī hameñ bhī koī khoī huī sub.h