nigah ke sāmne us kā jūñhī jamāl huā

vo dil hī jaane hai us dam jo dil kā haal huā

agar kahūñ maiñ ki chamkā vo barq kī mānind

to kab masal hai ye us kī jo be-misāl huā

qarār o hosh kā jaanā to kis shumār meñ hai

ġharaz phir aap meñ aanā mujhe muhāl huā

idhar se bhar diyā mai ne nigāh kā sāġhar

udhar se zulf kā halqa gale kā jaal huā

bahār-e-husn vo aa.e nazar jo us kī 'nazīr'

to dil vahīñ chaman-e-ishq meñ nihāl huā