saaqī ye pilā us ko jo ho jaam se vāqif
ham aaj talak mai ke nahīñ naam se vāqif
mastī ke sivā daur meñ us chashm-e-siyah ke
kāfir ho jo ho gardish-e-ayyām se vāqif
mar kar bhī tah-e-ḳhāk na āsūda hue aah
ai ishq na the ham tire anjām se vāqif
sayyād kī ulfat se phañse aan ke varna
the kaahe ko ham is qafas o daam se vāqif
milne kā payām us se kaho jā ke azīzo
jo us ke na ho vasl ke paiġhām se vāqif
auroñ se qasam khā.iye aur ham to mirī jaañ
haiñ ḳhuub tumhārī qasam-aqsām se vāqif
koī nahīñ kartā jo kiyā tū ne 'nazīr' aah
dil us ko diyā jis ke nahīñ naam se vāqif