kuchh din to malāl us kā haq thā
bichhḌā to ḳhayāl us kā haq thā
vo raat bhī din sī taaza rakhtā
shabnam kā jamāl us kā haq thā
vo tarz-e-bayāñ meñ chāndnī thā
tāroñ se visāl us kā haq thā
thā us kā ḳhirām mauj-e-dariyā
lahroñ kā jalāl us kā haq thā
bārish kā badan thā us kā hañsnā
ġhunche kā ḳhisāl us kā haq thā
rakhtā thā sambhāl shīsha-e-jāñ
tajsīm-e-kamāl us kā haq thā
bādal kī misāl us kī ḳhū thī
tābīr-e-hilāl us kā haq thā
ujlā thā chambeliyoñ ke jaisā
yūsuf sā jamāl us kā haq thā