ho ke mah vo to kisī aur kā haalā niklā

ham ne samjhā thā jise gul so vo laalā niklā

lene ḳhairāt tire chehra-e-pur-nūr se raat

badr chāñdī kā liye haath meñ pyālā niklā

us ke chehre pe nahīñ kākul-e-mushkīñ kī numūd

ye piTāre ke ta.iiñ toḌ ke kaalā niklā

thā irāda tirī fariyād kareñ hākim se

vo bhī ai shoḳh terā chāhne vaalā niklā

raat koThe pe chaḌhā vo to kahūñ kyā yaaro

manzar-e-bām se us ke vo ujālā niklā

barq juuñ chamke hai yā chhūTe hai jaise mahtāb

vo ujālā to kuchh is se bhī nirālā niklā

jī kī sab dhuum thī jab tan se vo niklā to 'nazīr'

phir na siine se uThī aah na naala niklā